F. de Belleforest, Cosmographie, 1575, p. 378-383 (transcription Ezéchiel Jean-Courret)

Des pays, contrées, seneschaucées, villes, cités et seigneuries qui sont sous la souveraineté du Parlement estably en la Cité de Bourdeaux
Gascoigne quelque temps non comprise en l’Aquitaine.
Il n’est ja besoing de diviser icy derechef l’Aquitaine, sauf en la consideration qu’on la prend pour le jourd’huy, & qu’elle fut considérée du temps de Charles le grand, que la Gascoigne n’estoit point comprise sous l’Aquitaine : veu qu’il est dit que Hunault Roy d’Aquitaine fuyant la fureur de Charles le grand, s’en alla retirer à Loup Duc ou Roy de Gascoigne ; mais ce Roy Françoys ayant tout dompté, & l’un, é l’autre furent compris sous le nom d’Aquitaine. Depuis, lorsque les Angloys eurent à cause du mariage de leur Roy avec l’héritier d’Aquitaine, pris possession de ce pays, & apres plusieurs guerres, & débats, en fin l’Aquitaine fut partie en Guienne, & Aquitaine, demourant ce non [sic] ancien à tout le pays limité par les départements faits jadis ;
Quelques terres comprises au pais dit la Guienne.
& sous le nom de Guienne estants comprises les contrées qui ores obéissent, & sont ressortantes au Parlement de Bourdeaux, & celles cy sont le Bourdeloys, Landes, Albret, Basadois, haute Gascoigne, partie de Biscaye, & Medoc outre le fleuve de Garonne ; mais de ça la rivière y sont les terres qu’on dit d’entre deux mers, dépendans de Bazas, & le Fronsadez ; puis le Perigort, & Limosin, & Saintonge, que nous avons descrit, pour ne confondre l’ordre des Provinces.
Pais d’entre deux mers ou posé & pourquoy ainsi dit.
Or pour ce qu’il nous faut revenir aux monts pour y voir la principauté Biernoise, nous commencerons aussi nostre description au pays d’entre deux mers, ainsi appellé à cause que la mer s’espand le long d’iceluy par deux bras, allant recevoir en son sein deux grosses rivières, l’une à Bourdeaux, qui est celle de Garonne, l’autre à Libourne, qui est la Dordonne, faisans ces deux comme une peninsule de ce pays, la pointe de laquelle est a un lieu nommé à présent Carbonnieres, & là où commence ce gros bouillonnement du flus, & reflus de la mer, qui va avec si grande furie le long du canal de Dordonne, qu’il n’y a navire qu’il ne renverse s’il le treuve de costé, mais le rencontrant de pointe, ces flots estans venteux, & se fendans facilement, s’esvanouissent comme une tousee par dessus le navire rencontré :
Que c’est que le Mascareth a Libourne.
Ceux du pays appellent cecy le Mascareth, lequel n’advient guere que durant les chaleurs de l’esté, & sur les Equinocces ; & ay veu les petits enfans l’attendre touts nuds sur la greve à Libourne, cette eau venteuse ne faisant que leur passer par dessus, eux enfans, couchez le ventre contre terre, & se tenans affermis contre des pieux, et poteau que pour cet effect ils plantent sur l’arène.
Pays d’entre deux mers divisé à plusieurs ressorts.
En ce pays d’entre deux mers sont quelques villes, les unes sont du pays d’Agenois, ja deduites, & les autres sont du Bazadois, & partie du Bordelois. Au Bazadois sont saint Bazeille, la Reola assises sur Garonne, en la dernière desquelles est un beau prieuré ancien fondé au nom de saint Benoist, & duquel on tient que la ville est renommée, entant qu’en Latin elle est dicte Regula, pour la reigle à laquelle ces religieux sont astraints par leur profession, mais avec le temps le mot Latin s’alterant en lieu de Regle, on a dit Reule, car c’est ainsi que les Gascons l’appellent, & ainsi l’ay je apprins d’un mien amy Chambrier dudit monastere, appellé Dom. P. Rolle Docteur en Théologie en l’université [379] de Paris. Ceste ville est riche, & forte, & a un chasteau duquel est faite mention en Froissard parlant des guerres Angloises.
Monsegur, ville ou assise.
A deux lieues de la Reole est Monsegur ville posée sur le fleuve du Drot, puis saint Ferme, Castel Mouron, Geronde, & plus haut Sauveterre, & jusqu’à la Dordonne il y a plusieurs villages : puis entrant au Bouredloys, on voit saint Macaire,
Comté de Benauges.
& le Comté de Benauges sujet à l’illustre maison de Candale : puis on vient selon le fleuve a Larmont [sic], & au lieu susnommé de Carbonnieres, & au Carbon Blanc, & de là à Libourne belle ville assise sur Dordonne, & en l’emboucheure de ce fleuve en la mer ;
Fronsac par qui fondé
outre laquelle vous voyez le pays de Fronsadez, a present Marquisat renommé de la ville & Chasteau de Fronsac, basty jadis par le Roy Charles le Grand, lorsqu’il alloit contre Hunaud s’estant retiré vers Loup Duc de Gascoigne ; l’ancien auteur nommé [sic] ce Chasteau Francique, mais le mot est corrompu comme de plusieurs autres, & est une des plus fortes places de la Guienne, & de l’assiette la plus plaisante assis sur la croppe d’un mont, & ayant son regard sur Libourne, & tout le long de la marine ; la coste duquel pays va s’estendant jusqu’à Bourg, & par deça au bec d’Ambes que les anciens ont appellé Ambros ; mais cela est desja en la contribution de Saintonge par nous descrit. Là aux entours est cest ancien Chasteau de Montauban duquel avons parlé cy dessus, non loing de Fronsac, & sur la riviere de Dordonne, duquel on ne voit a present que les ruines.
De la ville & cité de Bourd[eaux].
Et voila quant au pays, qui est en deça les rivieres de Dordonne, & de Garonne, reste a voir le plan de la tres ancienne, & excellente cité de Bourdeaux, & de ce que les anciennes histoires en chantent. Nous avons veu cy dessus que non seulement il y avoit deux citez portans tiltre de Metropolitaines d’Aquitaine, {Ptolomee li. 2 ch. 7. Tab. 3. d’Emp. Pline li. 4. Chap. 19. Stabon liv. 4.}ains encor deux sortes de Bituriges, de la premiere desquels nous avons parlé a Bourges, par ainsi nous restant la seconde Aquitanique, faut aussi voir les seconds Bituriges, que Ptolomee appelle Vibisces, que Pline met entre les Santons libres, & leur donne le nom d’Ubisces ; mais Strabon les nomme Josces, où le vocable est corrompu, & y faut lire Ibisces, desquels il parle en ceste sorte : « Garonne accrüe de trois rivières passe entre les Bituriges Ibisques, & les Saintongeois peuples de Gaule ». Puis ajoute chose qu’il ne continue point lorsqu’il dit : « car la seule nation de ces Bituriges est en Aquitaine estrangere, & foraine, & n’est point du corps des Aquitaniens, {Assiete de la cité de Bourd[eaux].} ayant neantmoins la cité de Bourdeaux qui luy sert pour marché, & commerce des foires, & laquelle est assise en des paluz causez par le regorgement de Garonne. Vous oyez Strabon qui vous dit que les Vibisces, ou Ibisces ne sont point naturels Aquitaniens, & toutesfois il ne propose quels ils sont, ny de quel pays venus, {Ibisces n’estoyent du corps Aquitanique}, qui donne occasion a d’autres qu’ils sont issus des Bituriges Cubes : ce qui n’est guere vraissemblable, puisque absoluement il dispense ceux cy de la societé Aquitanique, parmy les peuples de laquelle, il nomme ceux cy pelerins, estrangers, & forains : sur quoi n’ayans livres qui nous eclaircissent le passage nous attendrons que une plus grande, & solide lecture nous ayent fait sonder le gué, & trouver le fonds d’un passage tant difficile : & tant y a qu’Ausone qui se dit & confesse Bourdeloys se nomme luy mesme Vivisce en son Eidillie de la Moselle, où il dit ainsi :
{Ausone en sa Moselle Edillie, 9.}
“Hac ego Vivisca ducens ab origine gentem
Belgarum hospitiis non per nova foedera notus […]”
(Tel est le thème que j’aborde, moi qui suis issu d’une souche viviscaine, mais qui, par de vieux liens d’hospitalité, n’est pas étranger aux Belges ; [moi, Ausonius, romain de nom, mais né et élevé entre les frontières de la Gaule et de l’Europe])
Quelques Pedants voulans faire des correcteurs suffisans des vieux auteurs avoyent mis icy Vivisica, au lieu de Vivisca, ou Ibisca, ne sçachant (peut estre) que les Bourdeloys portassent jadis le tiltre de Bituriges Vivisces, & que pour l’esgard de Bourdeaux il se nommast Vivisce, il le montre lors qu’il continue son propos, disant :
“Ast ego, quanta mei dederit se vena liqueris,
Burdigalam cum me in patriam, nidumque senectae, Augustus pater ” Et ce qui s’ensuit
(i.e. : Ast ego, quanta mei dederit se uena liquoris, Burdigalam cum me in patriam nidumque senectae Augustus, pater et nati, mea maxima cura, fascibus Ausoniis decoratum et honore curuli mittent emeritae post munera disciplinae, latius Arctoi praeconia persequar amnis.)
Là où s’enstant renommé de la race des Vivisces icy il appelle franchement Bourdeaux le lieu de sa naissance, & fait cognoistre le desir qu’il a d’y aller passer le reste de sa vieillesse. {Strabon ne faut disant Bourde[eaux] avoir esté basty aux marests} Or revenant a propos sur ce que Strabon dit que Bourdeaux est assis sur les marests, & palus que fait là la Garonne, il ne le faut blasmer si a present on ne voit marest quelconque, veu qu’on l’a remply de bourriers, & des ordures de la ville, ainsi qu’il en est advenu en plusieurs endroits de Paris, lesquels n’estoyent jadis que marescages : & au reste a Bourdaux maintenant la Garonne n’y cause aucun marest, & s’il y en a, ce n’est du costé du fleuve, ains vers le derriere du Chasteau du Ha, ou du Far, qui ne se fait que des sources, & fontaines qui sont en cest endroit. {Description de la ville, & cité de Bourd[eaux].} La Cité de Bourdeaux donc est assise sur le bord de la Garonne, les flots de laquelle en plusieurs endroits lavent les murs de la ville, & en d’autres ils entrent jusque dans icelle, lorsque la mer est pleine au plein de la Lune, car alors elle va jusques devant le Palais, ainsi que souvent nous l’y avons contemplée : ce fleuve est devant ceste cité beau, grand, & large, fluant, & refluant tout ainsi que la mer, & se fait comme un croissant cornu allant le long du havre, d’autant qu’a l’Abbaye de sainte Croix, où est l’une corne, elle commence a flechir, & se recourber comme un arc jusques au Chasteau Trompete, où elle se remet en son cours, qui fait le plus beau, & asseuré port qui soit en Gaule, & dedans lequel peuvent entrer les gros navires tant soyent ils grans, pour y estre en rande seureté, & pour n’avoir faute d’eau, soit a y entrer au montant, ou pour en sortir y ayant maree : mais outre, & plus haut que Bourdeaux, il n’y a que les barques, & petits vaisseaux qui montent, & toutesfois par leur moyen va lon de ceste ville jusqu’a Tolose, & pays voisins le long de la Garonne, pour le trafic & commerce de marchandise. Et est ce costé maritime regardant le Septentrion, car au Midy Bourdeaux a le pays des Landes, au Levant tout de mesme, et a l’Occident les palus, & terroir de Medoc, & de touts ces costes est elle forte, tant de murs, bouleverts, ramparts, & fossez, que de l’assiette naturelle de la terre, selon que le pouvez considérer par la figure du plant cy representé. Ceste ville est de grande antiquité, ainsi qu’on recueille & par les murs qui sont au milieu de la ville, par les-[380]-quels {Bourd[eaux] plus grande que jadis} on voit que jadis elle n’estoit si grande qu’elle est a present ; mais au reste de dire au vray le temps de sa fondation, il n’y a homme qui le puisse asseurer trop bien lire lon les anciens auteurs, {Raisons pour l’antiquité de Bourd[eaux]} que ceste cité estoit lors que Cesar fut en Gaule, & Strabon qui vivoit sous Auguste nomme ceste ville Burdigale, d’où s’ensuit que ja du temps Romain elle estoit en essence : outre ce les Chrestiens sçavent que à Bourdeaux saint Martial disciple de Jesus Christ annonça la parole divine, & y fonda l’Eglise cathedrale de saint André laquelle fut Primatie d’Aquitaine, ce qui donne argument suffisant de sa gloire, & que pour son antiquité, & preeminence jadis sur le pays voisin, les Romains luy avoient conservé ses premiers droits, & juridictions : outre ce on voit de antiquitez fort grandes, {Palais Tutelle d’où appelé ainsi} comme le Palais Tutelle sur lequel plusieurs ont resué plusieurs choses, & lequel j’estime avoir esté dedie au Genie de la cité, & aux Dieux tutelaires, & en cecy j’ay pour tesmoing, & confirmateur le sieur Vinet, la memoire duquel j’honore, qui ès antiquitez de Bourdeaux en discourt {Helie Vinet liv. des Antiq[uitez] de Bourd[eaux]}, comme celuy qui est des mieux versez hommes de nostre aage, en ce qui concerne l’histoire de telles recerches : & lequel livre m’a esté mis en main par un mien amy, & ancien compaignon Bernard de Gerard sieur du Haillan natif de Bourdeaux, & un des ornements modernes de sa patrie, ainsi qu’il le fait paroistre par l’immortalité de ses oeuvres. {Description du Palais Tutele} Le susdit sieur Vinet dit que ce palais Tutelle fut jadis hors les murs de la ville, & sur le bord du fossé vers la part Septentrionale, là où a present il est dedans : & est de pierre quarrée, ayant cest edifice octante sept pieds de long, & soixante trois de large vouté par embas a plane façon a l’antique, mais au dessus sans nulle couverture, ayant eu huit piliers ou colonnes canelees de chacun costé, & six a chacun bout en sa largeur, desquelles n’y en a que dixhuit, qui soyent debout. {Palais Galienne Amphiteartre & sa grandeur} Quant au Palais qu’on appelle encor Galienne, & qui est hors la ville ayant ses murs de pareille estoffe que ceux de l’ancien, & premier bastiment : & lequel a trois cens septante pieds de long, & deux cens trente de large, ce fut sans nulle doute un Amphitheatre fait en forme d’ovale, de la cause de son nom je n’en scay d’autre, sinon que je le pense estre de l’Emper[eur] Galien, sous lequel fut dressé cest edifice, & en l’honneur dequel le gouverneur de ceste Gaule le surnomma de Galien, sur quoy qui en voudra sçavoir davantage, lyse l’oeuvre des antiquitez de Bourdeaux de Vinet, qui le contentera, s’il n’est trop dur a manier. {Interpretations mal digerees du nom de Bourd[eaux]} Quant au nom de Bourdeaux le sieur Vinet se moque (a bon droit) de ceux qui le raportent a ce que la ville est assise au bord des eaux, car par ce moyen toutes villes d’assiette pareille, desquelles il y en a grand nombre en France & ailleur, devroyent porter un nom semblable : comme encore il rejecte l’opinion de ceux qui tiennent le mot Burde Gale, vient de deux petites rivières, entre lesquelles est assise ceste cité, l’une appelée Bourde, & l’autre Gale, mais ce sont bourdes, veu que nul auteur approué a afait mention de telles Ethimologies : {Bourd[eaux] dit Bourdgal, & pourquoy]} & vaut mieux s’arrester a ce que les anciens ont appellé ce liue non Bourdeaux, ains Bourdgal, comme accourcissans, & changeans quelque peu le mot de Biturigala : & se deffend par quelques mots alleguez d’Isidore Evesque de Seville. Si le susdit Vinet n’avoit plus que satisfait a la curiosité des plus chatouilleux, je tascheroy de faire quelques autre recerche, mais je me contenteray de vous mettre la description de l’ancienne Bourdeaux, telle qu’Ausone Vivisque, ou Bourdeloys vous la met en ses villes lors que il parle ainsi :
{Ausone en son liv. des villes illustres.}
(Précédé par : Burdigala est natale solum; clementia caeli mitis ubi et riguae larga indulgentia terrae, ver longum brumaeque novo cum sole tepentes aestifluique amnes, quorum iuga vitea subter fervent aequoreos imitata fluenta meatus,)
Quadra murorum species, sic turribus altis
Ardua, ut aerias intrent fastigia nubes.
Distincta interne vias mirere domorum
Despositim latas nomen servare plateas,
Tum respondentes directa in compita portas,
Per mediumque urbais fontani fluminis alveum :
Quem pater Oceanus refluo cum impleverit astu,
Ad labi totum spectabis classibus aequor.
Trad. R. Etienne, Documents de l’histoire d’Aquitaine, Toulouse, 1973 : Bordeaux est le lieu qui m’a vu naître, Bordeaux où le ciel est clément et doux et où le sol bien irrigué multiplie ses bontés ; où le printemps est long, les hivers tiédis par chaque apparition du soleil, où les fleuves sont remplis du bouillonnement de la mer et dont le flot suivant le flux et reflux marin écume au pied des coteaux plantés de vignes. À te voir, tes murailles dessinent un carré et dressent des tours si hautes que leur faîte pénètre les nuages aériens. À l’intérieur, on admire les rues qui quadrillent la ville, l’ordonnance des maisons, la largeur des places, qui méritent leur nom ; puis les portes qui répondent en droite ligne aux carrefours et, au milieu de la ville, le lit d’un fleuve alimenté par une fontaine ; quand le père Océan l’emplit de son reflux bouillonnant, on voit s’avancer la mer toute entière avec ses flottes.
Vous voyez quelle il vous descrit ceste cité, à sçavoir carrée & petite, ayant de belles, & hautes tours, & cest enclos se peut encor remarquer en partie par ceux qui avec diligence se voudroient employer a regarder celle closture, qui est vers saint André, et saint Preject, car les fossez, saint Eliege, & la ville là bastie, est de l’accrüe moderne : de quoy je vous renvoye a mon auteur, qui vous en satisfera tout a loisir : {Bourdeaux chef de la Guienne} car il me suffit vous avoir monstré l’antiquité, & assiette de ce lieu a present chef de la Guienne, et où est le siege du Primat d’Aquitaine, quoy que le procez en soit encore au croc, non touché des Roys, ny vuidé par le saint siege apostolique, tant il semble que chacune des Eglises des Vivisces, & Coubes [sic] aye raison de poursuivre son droit : {Quelle fut la Primatie d’Aquitaine} l’une qui est la premiere Aquitanique, pour ce que l’autre est comme sa colonie : & la seconde à cause que les Cubes ne sont plus mis au rang des Aquitaniques, & que par nulle sanction Apostolique il n’est ordonné que ceste premiere aye sur elle aucune puissance. Au reste Bourdeaux (comme dit est) fut appellee a la foy par saint Martial, qui y prescha, & fonda la premiere Eglise, & depuis escrivit une Epistre aux freres nouvellement convertis. Je n’ay point recouvert le catalogue des Primats de la seconde Aquitanique, bien que ce soit sans nulle doute qu’il y en a eu des l’Eglise primitive, mais quelque jour Dieu aidant, nous en pourrons mieux fournir que maintenant {Anciens Archevesques de Bourd[eaux]} qu’il faut regarder ceux que trouvons és sessions des Conciles, si bien qu’au second concile d’Arles, qui fut sous l’Empereur Constantin le grand, nous voyons qu’Oriental Archevesque de Bourdeaux assista, & au Concile de Treves Ausone : Apres lequel fut Delphin, auquel escrit Paulin evesque de Nole, qui vivoit du temps de saint Hierosme. Sous le Pape Damase vivoit Cyprian : puis Amand, & durant le quatriesme Concile d’Orleans seoit a Bourdeaux Leonce, & en Aymon moine vous troverez un Frotaire, duquel avons parlé parmy les Evesques de Poitiers, & Bertrand de Got, qui depuis fut Pape sous le nom de Clement cinquiesme, qui depuis sa Papauté se tient quelquefois a Bourdeaux, pour laquelle occasion on voit encore pres saint André une porte renommée du Pape, & ainsi par succession ordinaire du depuis la primitive Eglise, cette cité n’a point esté sans pasteur. {Églises principales de Bourd[eaux]} Les Eglises principales sont saint André Cathedrale, & saint Severin (que vulgairement on [PORTRAIT à droite] [381] apelle S. Saturnin) qui est collegiale, posee hors la ville, mais fort ancienne où repose le corps de S. Severin archevesque de Coloigne, lequel vivoit du temps de S. Martin : {Cemitiere de S. Seurin a Bourdeaux} & hors de l’Eglise duquel est le cemitiere [sic], où la pluspart des chevaliers occis sous Charlemaigne par la consipration de Ganelon a Roncevaux, reposent & ou j’ay veu un tombeau haut eslevé sur des pierres qui se tiennent en l’air, lequel neantmoins est plain d’eau, lorsque la Lune est en son plein croissant, & qui diminue a mesure que la Lune va en decroissant. Je laisseray les Eglises de S. Preject, S. Pierre, S. Christophle, S. Michel, & autres, les quatres mendiants, & l’abbaie de S. Croix, & plusieurs autres choses considérables, comme encore le ruisseau de la Divice, passant en la ville, & les fontaines tant des fossez, S. Eliege, que d’ailleurs comme celle qui n’est plus, & de laquelle Ausone fait si grand compte, & qu’il appelle Divona pour venir au palais d’Ombriere {Palais de Bourd[eaux] ancienne demeure des Ducs de Guienne} qui fut jadis le siege des Ducs de Guienne, & lequel on a choisy pour Messieurs de la court [sic] de Parlement estably en cette cité par le roy Charles 7. {Maison illustres des presidens & Conseillers de Bourd[eaux]} & duquel comme d’une sainte Pepiniere sont sortis d’ecxcellens, & equitables juges, qui par leur vertu se sont faits cognoistre par toute la France : si bien que de nostre temps nous avons veu les Ages, Calvimonts, Chassaignes, Brinons, Aleaumes, Lescures, Ferrons, l’Ange, la Guionie, les SS. Symons, Carmains, les Comtes, les Selves, les Montagnes, Roffignacs, Pontacs, Gautiers, & autres faire telle parade de leur integrité, que les Juges de ce siege souverain ont eu l’honneur de tout temps de sçavoir joindre l’equité avec la misericorde, & d’user sagement de celle puissance absolue que les Roys leur ont donnee. {Siege de Seneschal a Bourd[eaux]} A Bourdeaux est encor le siege de Seneschal qui par precipu porte titre de Seneschal de Guienne, ayant des droits & preminences sur tous les autres sieges de ce ressort de ce Parlement, y est aussi l’Admirauté, où a rendu droit aux parties un fort long temps avec reputation d’equitable justicier le deffunt pere de Bernard de Gerard, que je nomme pour sa vertu, & pour l’amitié que je porte au fils, de laquelle je veux que cet oeuvre porte tesmoignage. Quant à l’hôtel de ville, & police ordinaire, c’est sans doute qu’avant les troubles de Guienne advenus l’an 1549, c’estoit la Seigneurie de ville la mieux dressee, & la plus segnalée de ce royaume, {Grandeur des Jurats de Bourd[eaux]} les Jurats (ainsi apelle lon les Eschevins) ayants de belles baronnies sujettes au corps de leur ville, & usans de justice haute, [PORTRAIT à gauche] [382] moienne, & basse, commandants sur les guets, & ayans en tout en leur mains [sic], & les forteresses, & les armes de la ville. Je me deporteray du malheur de cette sedition, & alteration qui s’ensuivit, comme de chose & mal a propos & sans proffit, & la faute de laquelle ne devoit estre rejettee sur le corps innocent de cette ville, ains sur autres qui meritans la peine s’evaderent, & d’autres qui furent payez selon leur folie, & outre-cuidance. {Excellente Université de Bourd[eaux]} Cette ville est ornee d’une belle université en touts arts & sciences, y ayant escoles de droit, & Theologie, mais sans exercice qui face à estimer : mais quant aux lettres humaines, je diray que du temps que je fus auditeur, on pouvoit donner ce loz a la cité de Bourdeaux qu’elle estoit des mieux fournier d’hommes de sçavoir en son college, pour une seule escole qu’université qui fut en l’Europe, & d’où sont sortis plusieurs hommes dignes de loüange. {Voy Ausone au livre des regions de Bourd[eaux]} Aussi est-ce de long temps que les bons arts y ont flory, & que les gents de sçavoir s’y sont retirez, à cause de la beauté de la ville, bonté des citoiens, gracieuseté des chefs, avancements des jysans, obeissance des auditeurs, & recognoissance de ceux qui travaillent : joint que le Climat y favorise aux Muses, y ayant des lieux solitaires aux entours, & que la frequence des estrangers nourrit l’oreille des convoiteux de sçavoir tousjours de quelque cas de nouveau recité par les estrangers qui y abordent. Que diray-je d’avantage de cette excellente cité, sinon que c’est le siege des Muses, & la corne d’abondance de tout bien, le plaisir des hommes, & le lieu où les celestes espandent leurs graces ? & à laquelle je consacre les vers mesmes que son nourrisson Ausone a chantez d’elle disant ainsi :
{Ausone és. Illustres}
Impia ia dudum condemno silentia, quod te
O Patria, insignem Baccho, fluviisque, virisque
Moribus, ingeniisque hominum, procerumque senatu
Non inter primas memorem, quasi conscius urbis
Exiguae, immeritas dubitem contigere laudes.
Car il n’y a perfection és autres villes, qui ne se treuve en cette-cy, soit pour les vivres, soit pour les armes, soit pour la marchandise, & (sur tout) soit pour les bonnes lettres. {Vignoble, & bons vins de Bourd[eaux]} Et pour sortir de Bourdeaux, vous n’avez contree en France où Bacchus soit plus liberal, ou plustost prodigue de ses dons, & liqueur vineuse, de sorte que le vin de Grave est cogneu par toute l’Europe Occidentale, & Septentrionale, chacun desirant y porter ses denrees pour jouyr de cette liqueur tant precieuse, soit des vignes de Larmont, de [383] la Bastide, {Commoditéz qui sont a la ville de Bourdeaux} & lieux voisin, ou passant plus outre de ces vins blancs qui croissent a Melion, lesquels ne doivent rien aux Grecs de Malvesie & de Candie : comme encore le pain de Potensac, & d’Alençon places voisines est renommée pour le plus delicat de la Guienne. Je laisse la bonté des chairs, l’abondance, & diversité du poisson, pour dire en un seul mot, que pour le plaisir de l’homme la ville de Bourdeaux devroit estre choisie, si l’air marin & les vapeurs des eaux ne la rendoyent un peu mal saine, & sujette a maladies, & bien souvent a la peste. Le long de la mer au dessous de Bourdeaux est la ville de l’Esparre, puis le Promontoire Curian a present Cap sainte Marie, & és entours des palus le pays de Medonc fort bas a merveilles, & parainsi sujet aux inondations des eaux, de sorte que les flus estans grans, & puis venans a s’escouler, on voit les sables, {Neomagus ville jadis en Medonc sumergee par la Garonne.} & parmy iceux des ruines de murailles, qu’on estime estre cette ville de Neomagus que Ptolomee marque au dessous de Bourdeaux, chose non difficile à croire, veu que de nostre temps mesme pareilles choses sont advenues, la mer engloutissant en ses debords des villes toutes entieres, qui estans en bas leiu estoyent emmenees par les violences de ses ondes. Le long de cette coste basse & marecageuse, & pleine des limons que les ravines de Garonne y amenent, est le costeau de Blanquefort apartenant aux Seigneurs de Duras, {Pays de Buchs} & le pays de Buchs, qui est principauté, & le Seigneur duquel porte titre de Captal, comme qui diroit, appartenant a l’illustre maison de Candale, & est ce pays abondant en pins resineux : d’où advient que la chandelle qu’on fait de cette matiere est apellée par gausserie a Bourdeaux Candale de Buchs, de laquelle se servent les pauvres gents par tout ce pays, & en Armaignac, Bearn, & Bigorre, tellement que leurs maisons en sont toutes noires pour la fumée que rend ce luminaire, a quoy je pense qu’a pris allusion Paulin escrivant a Ausone lors qu’il dit :
{Ausone aux Epistres}
Nigrantesque casus, et texta mapalia culmo
Veu que cette fumee noircit estrangement, & qu’il n’y a cabane, ny maison villageoise, qui n’en soit tout noircie, voire les personnes mesmes sentent ce muse medonquin, qui les rend tous haves, & d’un regard tenebreux, avec ce que ny les Medonquins, ni les Lanusquets, ne sont guere belles gents d’ordinaire. Mais c’est assez arresté ci dessus, voyons un peu le reste de la Guienne, qui sont les Landes (…)